Në datën 27 Janar Spitali Amerikan do të organizojë një koncert bamirësie për fëmijët që kanë lindur me probleme në dëgjim. Koncerti do të zhvillohet nën moton “Më shumë tinguj tani e përgjithmonë”.
Në këtë aktivitet do të performojnë disa prej emrave më të njohur të muzikës lirike dhe asaj tradicionale shqiptare, e pranishme do të jetë edhe sopranoja e suksesshme botërore Maria Jose Siri, tenorët Josif Gjipali, Kastriot Tusha dhe Mario Karaj. Soprano Sindi Mamaqi, si dhe këngëtarët Rona Nishliu, Dren Abazi së bashku me pianistin Ekland Hasa. Orkestra do të jetë nën drejtimin e dirigjentit të mirënjohur italian Francesco Ledda. Koncerti do të jetë në prezantimin e Ema Andreas.
Të ardhurat nga shitja e biletave do të shkojnë për realizimin e operacioneve për vendosjen e implantit koklear tek fëmijët që kanë lindur me probleme me dëgjimin.
Ky koncert zhvillohet në prag të festimit të 10 vjetorit të krijimit të Spitalit Amerikan. Për më shumë vëmendje dhe përkrahje ndaj kësaj teme tepër të ndjeshme dhe problematike Spitali Amerikan, ju fton të bëheni pjesë!
