Duket se rikthimi në kombëtare, aktivizimi si titullar në kualifikuesen e 24 marsit ndaj Italisë, në “Renzo Barbera” të Palermos, i ka shërbyer për mirë Sokol Cikalleshit. Sulmuesi kavajas ka shënuar në limitin e kohës shtesë, duke i dhënë skuadrës së tij turke, ku është huazuar, fitoren. Ky sukses, për koinçidencë, ka ardhur ndaj skuadrës tjetër turke, që zotëron kartonin e Cikalleshit. Përballja mes Akhisar Belediyespor dhe Istanbul Başakşehir është mbyllur me fitoren e vendësve, me rezultatin 2-1. Ricardo Vaz Té ka zhbllokuar shifrat e bardhë, në minutën e 58-të, ndërsa Y.Ayhan ka barazuar në minutën e 78-të.
U duk se kjo sfidë po shkonte drejt barazimit, por Sokol Cikalleshi nuk ka qenë i kësaj mendjeje, duke realizuar në minutën e 94-t golin, që ndëshkoi miqtë dhe lumturoi vendësit. Evidentojmë faktin se sulmuesi ynë i kombëtares është hedhur në fushë si zëvendësues në këtë ndeshje, në minutën e 83-të, në vend të Hurmaci. Kampionati turk i futbollit (Superliga) ka mbërritur në javën e 26-të të tij, teksa skuadra e Cikalleshit, ku u huazua në janar, ndodhet në vendin e 13-të, aktualisht, me 30 pikë. Ky ishte goli i parë në kampionat i Sokol Cikalleshit me Akhisar Belediyespor, skuadër me të cilën ka luajtur 335 minuta lojë në 5 ndeshje aktivizim.
https://www.dailymotion.com/video/x5gyaij_sokol-cikalleshi-goal-hd-akhisar-genclik-spor-2-1-basaksehir-01-04-2017_sport
