Natasha Bajrami është një grua e komunitetit rom që jeton në kushtet ekstreme të varfërisë. Nuk kishte të ushqente 12 fëmijët e saj, ndaj 3 prej tyre i dërgoi në Jetimoren e Shkodrës.
Prej ditës kur në media doli lajmi i prokurorisë se fëmijët e Jetimores janë abuzuar jo vetëm fizikisht por edhe seksualisht, kësaj nënë nuk i thahen lotët.
Ajo nuk shkulet nga kangjellat e Jetimores. “Dua ti marr në shtëpi tre vajzat e mia, nuk i lë më asnjë ditë këtu”, shprehet ajo, ndërsa lotët nuk i ndalen. “Në shtëpi (kasolle) jetojmë shumë keq, por më mirë pa bukë se sa kështu…, vazhdon rrëfimin e saj Natasha.
Sakaq ajo bën edhe një akuzë të drejpërdrejtë për Ministrinë e Mirëqenies Sociale.
“I solla vajzat këtu, pasi kjo ministri më premtoi strehim, por nuk më tha kurrë shtëpi”, thotë ajo.
“Edhe vetë vajzat duan të vijnë në shtëpi”, vijon Natasha, “pasi këtu janë dhunuar sistematikisht nga edukatoret dhe fëmijë të tjerë të qendrës, më të rritur se ato”.
Ajo tregon letrat që vajzat e mitura i kanë shkruar dhe i përgjërohen ti marrë në shtëpi.
