Në disa shkolla në Tiranës fëmijët blejnë dhe shesin drogën pa kurrfarë problemi. Kamera e fshehtë e Fiks Fare sjell faktet e fenomenit të rëndë social, për të cilin reagimi institucional dhe shoqëror është Zero.
Në shkollën e Mesme Profesionale në Kamzë, gjatë pushimit të gjatë, disa djem bisedojnë me ekipin e Fiks Fare. Biseda bëhet pranë kangjellave të oborrit të shkollës.
Njëri nga djemtë zotohet se do t’i ndihmojë për t’i gjetur hashashin, por i duhet të bisedojë me shokun e tij. Më pas, pranë bashkëpunëtorëve të Fiksit shkon një djalë tjetër dhe e pyet se për kur e do, pasi ai është përdorues vetë. “Unë përdorues jam, po s’kam për momentin. Sa të shkoj e ta marr”, thotë nxënësi.
Pas 30 minutash, shkon një shitës, i cili thotë se ka dy teke. Teke është kodi që ai përdor për dy doza hashashi. Bashkëpunëtorët dhe shitësi largohen pak nga shkolla. Shkojnë në një ndërtesë të vjetër që ndodhet 20 metra larg shkollës së mesme profesionale të Kamzës. Atje shitësi i jep hashashin. “Ke shumë aty, mjafton. Ke për dy herë”, thotë shitësi.
Fiksi shkon edhe në shkollën 9-vjeçare “Aleks Buda” në Laprakë. Gazetarët pyesin nxënësit që ndodhen gjatë pushimit të madh pranë rrethimit të oborrit të shkollës se kush mund t’ju gjejë hashash. Nxënësit tregojnë një qendër lojërash elektronike. Në këtë qendër ndodheshin disa djem, ku njëri prej nxënësve futet dhe merr mallin brenda.
Pas blerjes kamera e fshehtë ka filmuar momentin kur nxënësit e shkollës 9 vjeçare përgatisin cigaren e hashashit në oborrin e një pallati që ndodhet pranë shkollës. Ata shprehen se malli është i mirë. Për të gjitha dozat, shitësit kërkojnë 10 mijë lekë të vjetra.
*Shihni videon nga minuta 2:29
