Leonard Tasho, 58 vjeç, është burri që ndërroi jetë sot në një rrugë të Tiranës. Dëshmitarët thanë se në fillim ai kishte shenja jete por për shkak të vonesës së ambulancës, ndërroi jetë. Siç shihet në videon denoncuese, që një qytetar dërgoi në opinion.al, edhe pasi mbërrin ambulanca, burri i shtrirë në tokë nuk transportohet në spital. Sipas një urdhëri të Ministrisë së Shëndetësisë, të vdekurit i transporton autoambulanca e morgut.
Ngjarja ka ndodhur mesditën e sotme në unazë, pranë kryqëzimit tek “farmacia nr.10” ose ndryshe 200 metra larg nga QSUT-ja.
Opinion.al pas mbërritjes së denoncimit u interesua pranë Drejtorisë vendore të Policisë së Tiranës dhe pranë Ministrisë së Shëndetësisë. Policia përmes zëdhënësit tha se “sapo është marrë njoftimi ka shkuar patrulla që ndodhej më pranë vendngjarjes”. Siç shihet në video, aty ka mbërritur një polic i Rrugores. Disa minuta më vonë ka mbërritur edhe ambulanca e urgjencës së Tiranës. Denoncuesi tha se ambulanca ka vonuar 30 minuta. Për këtë, presim të marrin edhe një reagim nga Drejtoria e Urgjencave, që u tregua e gatshme të na mundësonte oraret e lëvizjes së ambulancës sipas GPS. Jo vetëm kaq. Janë dashur edhe 30 minuta të tjera që të mbërrinte ambulanca e morgut. Policia thotë se ne nuk kemi të drejtë të ndërhyjmë. Pra pritet ambulanca. Ambulanca e urgjencës pret të mbërrijë urgjenca e morgut, kështu i sëmuri që ndërroi jetë qendron mbi 1 orë në rrugë. Denoncimi: I semuri i shtrire ne rruge
Lidhur me shkaqet e vdekjes, Opinion.al mësoi se, 58 vjeçari vuante nga zemra dhe dyshohet se një atak i ka marrë jetën. Ky rast është denoncuar nga qytetarët që kanë parë skenën. Kjo nuk është hera e parë që ambulanca denoncohet për vonesa. Kjo, gjithashtu nuk është hera e parë që mungesa e koordinimit e ka bërë jufunksional sistemin e ndihmës së shpejtë në vendin tonë.
Ajo ç’ka vihet re në të tilla raste, është se institucionet thjesht kërkojnë të shfajësohen duke ia hedhur fajin njëra-tjetrës. Asnjë masë nuk merret, për pasojë qytetarët humbin jetën edhe kur ndodhen vetëm 200 metra larg spitalit. /Riviera Dedaj- Opinion.al
