Ky është momenti kur 45 – vjeçari Ilir Lelo hyn në kazinonë pranë rrethrrotullimit të “Zogut të Zi”, i pamaskuar dhe më pas i drejton pistoletën punonjësit të sigurisë.
Pasi i kërkon ta dërgojë te operatori që ndodhet brenda kazinosë, Lelo, kanos edhe punonjësin tjetër. Ai merr paratë, një shumë prej 625 eurosh dhe largohet duke kërcënuar me armë punonjësin e sigurisë.
Më pas i drejtohet në rrugën “Mine Peza” ku planifikonte grabitjen e një kazinoje të dytë.
Në pritje për të kanosur me armë punonjësit, ai u ndalua nga efektivët e Komisariatit Numër 3, që ishin vënë në ndjekje të tij.
Ai u prangos dhe menjëherë u dërgua në ambientet e Drejtorisë së Policisë së Tiranës.
Atij iu gjetën me vete 625 euro të grabitura në kazinonë pranë Zogut të Zi, si dhe arma e krimit, një pistoletë “TT”, model 54, me fishek në gojë.
Po ashtu, Lelës iu gjet edhe një pult komandimi që dyshohet se ai e përdorte për të manipuluar makinat e lojrave të fatit, me qëllim për të fituar fiktivisht pikë në to.
Hetuesit dyshojnë se ai është po ashtu i njëjti person që ka kryer edhe grabitjen e ndodhur në rrugën e Elbasanit të mërkurën, kur një person i maskuar mori një shumë prej 2 milionë lekësh.
Tv Klan
