Ky person që duket në këtë pamje besohet se është Klodi Lesi, 33 – vjeçari nga Rubiku që vrau bashkëshorten e tij greke dhe u arratis me djalin 4 – vjeçar.
Policia greke po shqyrton me hollësi pamjet, për të vërtetuar nëse burri me fëmijën në krahë që ecën me nxitim, është pikërisht shqiptari i shpallur në kërkim prej 6 Janarit.
Pamjet i përkasin një kamere sigurie pranë një stacioni autobusësh në Athinë, nga ku mendohet se Lesi ka udhëtuar bashkë me djalin e tij 4 – vjeçar drejt Prevezës.
Mediat greke raportojnë se në këtë zonë ka nisur një operacion i madh policor, pas informacioneve se 33 – vjeçari po i drejtohet kufirit shqiptar.
Në të gjitha rrugët janë ngritur postblloqe, ndërsa autoritetet portuale në Igumenicë dhe Korfuz kontrolluan të gjitha tragetet, pas dyshimeve se shqiptari arratisej drejt Italisë.
Pak ditë më parë një prej avokatëve të njohur grekë, Aleksis Kujas tha për mediat se ishte kontaktuar nga Klodi Lesi dy ditë pas krimit, por më pas shqiptari nuk ishte bërë më i gjallë.
Familjarët e tij dhe prindërit e bashkëshortes i kanë bërë apel të dorëzohet bashkë me djalin 4 – vjeçar, por Lesi vazhdon të mbetet në arrati.
