Një shqiptar humbi jetën tragjikisht në Greqi, pasi fabrika ku punonte në qytetin e Volos shpërtheu në flakë.
45-vjeçari, së bashku me dy punëtorë të tjerë, ishin duke salduar kur papritur ndodhi një shpërthim gazi dhe ndërtesa u përfshi nga flakët e zjarrit. Fatkeqësisht shqiptari nuk mundi të dilte dhe humbi jetën i asfiksuar nga tymi, shkruajnë mediat greke.
Trupi i tij i pajetë u gjet në disa shkallë të brendshme të ndërtesës. Identiteti i tij nuk është bërë publik, ndërsa mediat greke thonë se ai ishte baba i tre fëmijëve. Ndërsa dy punonjësit e tjerë arritën të dilnin nga godina pa lëndime të mëdha.
Në vendngjarje mbërritën forca të shumta policie dhe të ndihmës së shpejtë. Pas 3 orësh përpjekje, zjarrfikësit mundën të vendosnin në kontroll flakët e zjarrit. Autoritetet kanë nisur hetimet për të zbardhur shkaqet e shpërthimit në fabrikë.
