Colorado Rapids u bë i pesti ekip në historinë e MLS-së (Major League Soccer) që mbyll një sezon të tërë pa u mundur në ndeshjet në fushën e vet.
Dhe kjo falë Shkëlzen Gashit, që mbrëmë shënoi golin e tij të nëntë në këtë sezon të kampionatit amerikan të futbollit.
Colorado Rapids barazoi 1-1 me Houston Dynamo-n, në takimin e fundit të sezonit të rregullt. Wenger i kaloi udhëtuesit në epërsi në minutën e 20-të. Barazimi erdhi nga këmbët e Gashit, që shënoi në minutën e 67-të.
Ky ishte goli i nëntë i tij, por i pari në “Dick’s Sporting Goods Park”. Ai u cilësua dhe lojtari i ndeshjes.
Colorado Rapids e mbylli sezonin e rregullt në vend të dytë në Konferencën Perëndimore, me vetëm dy pikë pas Dallas-it të vendit të parë. Kampionati vijon me fazën e play-off-it.
