Një video e një sherri në Himarë është bërë virale në rrjetet sociale. Sikurse shfaqet në pamjet e mëposhtme dy pushues shqiptarë zihen me një turist të huaj me ngjyrë, i cili u flet anglisht që të largohen prej tij.
Në pamje duken dy djemtë që përplasen fizikisht me shtetasin e huaj, por duke u favorizuar nga fiziku, turisti, pasi i kishte rrëzuar një herë në tokë, arrin që t’i shmangë që të dy, dhe iu kërkon të largohen duke iu thënë “go away”. Incidenti është regjistruar në Livadh të Himarës, ndërsa nuk dihet se për çfarë arsyesh shtetasi i huaj në video është konfliktuar me dy qytetarët.
Kur jemi në kulmin e sezonit turistik, vendi ynë herë pas here është përfshirë nga një sërë episodesh aspak të mira për sa i përket tërheqjes së turistëve të huaj në vendin tonë.
Disa ditë më parë një tjetër incident është shënuar mes disa pushuesve dhe pronares së një vile. Kjo e fundit u shtri para makinës së turistëve me qëllim që ata të mos largoheshin pasi sipas saj kishin prenotuar për tre ditë dhe qëndruan vetëm dy./Opinion.al
