Rrëfimin e Marjan Rrokut për krimin që ai kishte kryer 15 vite më parë në Tiranë, Ornela Canaj e quan një vrasje të dytë për motrën dhe nënën e saj.
Në një profil të hapur enkas në facebook pasi Marjan Rroku pranoi për herë të parë vrasjen në emisionin “E diela shqiptare”, në një bisedë me moderatorin Ardit Gjebrea, Ornela thotë se Marjan Rroku e kishte paramenduar vrasjen e Alda Canajt dhe nënës së saj dhe se asgjë nuk kishte ndodhur rastësisht.
“Marjan Rroku vendosi të thotë versionin e shpikur të ngjarjeve, dhe harroi të përmendte se si çdo mëngjes ai priste motrën time të vogël te dera e jashtme e shtëpisë dhe e përndiqte. Nën shenjestrën e armës, e ndaloi Aldën e pambrojtur, 16 vjeç duke e detyruar atë me forcë të vendoste që ose të shkonte me të, ose do të vdiste”, -shkruan Ornela në postimin e saj.
Ajo thotë se familja e saj u detyrua të ndërronte dy shtëpi brenda dy muajsh nga përndjekja që i bënte 27 vjeçari dhe se e kishte denoncuar 6 herë në polici Rrokun për episode të dhunshme.
“Për muaj me radhë familja jonë u përndoq dhe torturua fizikisht dhe mentalisht nga ky kriminel që fshihej nën titullin e tij zyrtar si punonjës i SHIK-ut. Në 29 Mars të vitit 2001, Marjan Rroku gjakftohtësisht qëlloi shtatë plumbat që vranë mamanë dhe motrën time. “Ishte nje skenë e tmerrshme”. Pasi pashë emisionin në Klan ndihem se mami dhe motra ime u vranë, sërish, për herë të dytë”, shkruan Ornela në postimin e saj.
Tv Klan
