Lefter Pirja denoncoi në emisionin “Stop” dhunën nga katër persona, të cilët e kanë goditur me thika e doreza, për shkak se u kërkoi dërrasat e ndërtimit që i kishin marrë.
“Katër persona, që i kam denoncuar në policinë e Kuçovës, më kanë goditur të premten në darkë. Më kanë goditur nuk e di me çfarë, me thika, me doreza. Më kanë çarë siç e shikoni dhe vetë dhe kam shkuar në spitalin e Kuçovës. Aty ka mbërritur policia dhe kam denoncuar një person nga personat që kanë filluar sherrin. Ky person quhet Afrim Pirje”.
Denoncuesi rrëfeu si nisi ngjarja nga fyerjet e tyre dhe më pas degradoi në dhunë fizike nga tre persona kundrejt tij. Ai ka ende në trup e fytyrë shenjat e plagëve të thella dhe për këtë ka bërë denoncim në polici, por personat dhunues vazhdojnë të enden të lirë dhe polici i zonës Dule Metushi nuk ka bërë asgjë.
“I kam në lagje, i kam në lokal, ham e pijmë, por siç e pësova unë do ta pësojë një tjetër nesër. I plotfuqishmi i zonës, Dule Metushi s’ka bërë asnjë lloj veprimi për katër emrat që i kam dhënë unë. Unë kërkoj drejtësi nga shteti, ndaj kam ardhur te ju se shoh që shteti nuk po vepron siç duhet”, u shpreh i përlotur i dhunuari.
Gjatë një komunikimi me kamera të fshehtë, Metushi thotë se nuk mund të bëjë asgjë nëse viktima e dhunës nuk merr raport mjekësor.
