Në ndeshjen Barcelona-Athletic Bilbao, trajneri Luis Enrique sot la në stol sulmuesin Luis Suarez dhe zëvendësoi në minutën 64′ yllin Lionel Messi. Këto dy vendime të tij janë muzikë për veshët e gazetarëve, gati për të ngritur hipoteza se çfarë po ndodh në shtëpinë katalanase. Lënia e Suarezit në stol mund të kuptohet, sepse rotacioni është një praktikë e njohur në futbollin modern, por Messi është Messi, një lojtar krejt ndryshe nga të tjerët dhe i nevojshëm për 90′ për efekt marketingu.
Kështu, i pyetur se pse “Pleshti” duhej larguar nga fusha, kur kishte shënuar një nga golat më të bukur në karrierë, Enrique befasoi plotësisht, sepse … nuk dha një përgjigje. “Nuk do të komentoj”, – iu drejtua tekniku gazetarëve. “Ju gjithmonë doni një histori, por nuk dua që ta shkruani këtë. Nuk do t’ju jap informacione”, – shtoi ai. Enrique u përqendrua vetëm te gjërat e mira. “Kjo është një ditë pozitive për ne. Na duhet gjithë skuadra dhe sot lojtarët treguan se janë të përgatitur“, – theksoi 46-vjeçari.
