Bankat e nivelit të dytë kanë edhe dy javë kohë të dorëzojnë në Prokurorinë e Tiranës të dhënat e kërkuara nga grupi hetimor që po verifikon akuzat e ngritura nga Policia e Tiranës dhe Drejtoria e Pastrimit të Parave për ish -kandidatin e Bashkisë së Tiranës, Gjergj Bojaxhi.
Pas regjistrimit të kallëzimit penal për akuzat “Mashtrim me Kredi”, “Pastrimit të produkteve të Veprës Penale apo Veprimtarisë Kriminale” dhe “Fshehje të Ardhurash”, Prokuroria Tiranës iu drejtua 2 javë më parë me një kërkesë për informacione të detajuara disa bankave.
Sipas ligjit ato duhet t’i përgjigjen organit të akuzës brenda muajit.
Përveç identifikimit të llogarive bankare të Bojaxhiut, prokurorët kërkojnë nga bankat të identifikojnë edhe llogaritë e të afërmve të tij, apo dhe kompanive të lidhura me ta, përsa u përket transaksioneve të kryera në mënyrë analitike, që nga krijimi i tyre.
Burime të Televizionit Klan mësuan se prokurorët që po hetojnë këtë dosje i janë drejtuar edhe Drejtorisë së Tatimeve, ku kërkohet verifikimi i të gjitha veprimeve që ka kryer Bojaxhi si admnistrator i kompanisë “Everest Oli” dhe nëse janë shlyer të gjitha detyrimet ndaj shtetit.
Në vorbullën e institucioneve të përfshirë në hetim është edhe QKR, që po verifikon përputhjen e të dhënave në sistem me veprimet e kryera në terren prej Bojaxhiut me kompaninë e tij, që ka qarkulluar miliona dollarë.
Deri në këto momente, prokurorët kanë qenë mjaft të rezervuar në dhënien e informacioneve për këtë çështje për shkak të sensitivitetit të saj, si pasojë e shumave marramendëse të parave që kanë qarkulluar në një kohë të shkurtër nga Bojaxhi.
“Everest Oil” u regjistrua në vitin 2012, por në pak muaj qarkulloi 29 milionë dollarë. Ndërsa në vitet 2013 dhe 2014, fitimi i kompanisë ishte mbi 200 milionë lekë, megjithëse kishte nga 6 në 11 punonjës.
Në hetim janë transaksione prej 26 milionë dollarësh, të derdhura nga Bojaxhi në llogari të kompanisë “Everest Oil”, në periudhën 2012 – 2015.
Nën hetim është edhe lëvizja e vjehrrës së Bojaxhiut, Lumturi Hasmataj, që ishte aksionere e “Everest Oil” dhe i shiti aksionet vetëm për 26 mijë euro, ndërkohë që vetëm nga shpërndarja e fitimit të kompanisë për vitin 2014, ajo ka përfituar 430 mijë euro, çka për policinë konsiderohet një veprim i dyshimtë, i lidhur me zinxhirin e skemës së pastrimit të parave. Tv Klan
