Rene Higuita ka përgëzuar portierin kilian të Barcelonës, Claudio Bravo, për përpjekjen e tij, që të imitojë “Escorpion”, pritjen që bëri portieri i famshëm kolumbian. Kjo është një nga pritjet më të mira që ka bërë një portier në historinë e futbollit dhe ka ndodhur gjatë një ndeshjeje miqësore ndërmjet Kolumbisë dhe Anglisë. Pritja u quajt “escorpion”, teksa Jose Rene Higuita e largoi topin, që ishte adresuar në rrjetën e tij, me një veprim spektakolar, me këmbët mbrapa, jo me duar.
Që nga ajo kohë ka pasur shumë portierë, të cilët janë përpjekur të kopjojnë me sukses, kush më shumë e kush më pak, të famshmin kolumbian. Përpjekja e fundit ka qenë e portierit të Barcelonës dhe kapitenit të kombëtares kiliane të futbollit, Claudio Bravo. Ky i fundit e ka provuar këtë lloj pritjeje në seancën stërvitore me ekipin e parë të Barcelonës.
