Një aksident i ka marrë sot jetën 50-vjeçares Lefteri Binjaku. Aksidenti i rëndë ndodhi në momentin që ajo po përpiqej të kalonte rrugë në zonën e Metalurgjisë në Elbasan.
Gruaja u përplas për vdekje paraditen e sotme nga një makinë tip “Opel”.
Ashtu siç mund të shihni edhe në videon e publikuar nga “Panorama.al”, automjeti që ka përplasur gruan është me shpejtësi të lartë.
Pamjet tregojnë se 50-vjeçarja po tentonte të kalonte me vrap në anën tjetër të rrugës, por shpejtësia e “Opel”-it e ka hedhur disa metra në lartësi dhe më pas është përplasur në tokë.
Duket se shoferi i makinës tip “Opel” ka tentuar të frenoi, por pa sukses dhe kjo për shkak të shpejtësisë së lartë të makinës.
Më pas policia ka bërë edhe arrestimin e shoferit 36-vjeçar, i cili u largua nga vendi i ngjarjes. Ai e kishte parkuar automjetin “Opel” brenda një ndërtese në ndërtim dhe vetë ka tentuar të arratiset.
“Falë ndjekjes nga shërbimet e Komisariatit të Policisë Elbasan, Policisë Rrugore të DVP Elbasan, Forcave të Posaçme “Shqiponja” dhe Njësisë Operacionale është bërë e mundur kapja e drejtuesit të mjetit, shtetasit E. M., rreth 36 vjeç, banues në fshatin Katundi i Ri, Elbasan, i cili ndodhet në ambientet e Policisë, për kryerjen e veprimeve të mëtejshme procedurale. Mjeti tip “Opel” është sekuestruar në cilësinë e provës materiale”,-njoftoi policia.
