Mungesa e sigurisë rrugore u bë shkak për një tjetër aksident të rëndë në autostradën Rrogozhinë – Plepa.
Hekurat e parmakëve mbrojtës e përshkuan tej për tej një automjet, që u përplas me të në këtë dalje të rrugës në kryqëzimin e Syneit.
Fillimi i parmakëve mbrojtës nuk ka asnjë element sigurie, që nevojitet për të minimizuar aksidentet në raste përplasjeje.”
Ngjarja ndodhi pasditën e së shtunës, kur ky furgon i ngarkuar me mall, i drejtuar nga Beqir Muça, u përplas me barrierat anësore, pranë fshtatit Synei, në afërsi të Kavajës.
35 – vjeçari ka marrë plagë të rënda dhe është dërguar me urgjencë drejt Spitalit të Traumës në Tiranë.
Siç shihet edhe nga pamjet, gardiela mbrojtëse ka hyrë mespërmes automjetit, duke sjellë në vëmendje aksidentin tragjik të 7 Majit, në Golem, ku humbën jetën dy fëmijët e mitur të familjes Negollari.
Ashtu si në rastin e parë, edhe këtë të shtunë, shkak është bërë një ndërprerje e gardielave.
Megjithatëse në rastin e parë ato nuk ishin vendosur për të favorizuar një karburant anës rrugës, pavarësisht se kishte një vendim të formës së prerë të gjykatës, në këtë rast, bëhet fjalë për një dalje nga rruga kryesore, në një rrugë dytësore.
Por sërish faji bie mbi sigurinë e mbrojtëseve metalike, që nuk kanë qenë të shoqëruara me sinjalistikë dhe aksesorë, që bëjnë të mundur amortizimin e goditjes dhe nuk lejojnë që mbrojtëset metalike të kthehen në një armë vrasëse në rrugë.
Vlen të përmendet që në këtë aks janë evidentuar nga Policia Rrugore e Durrësit dhe nga Bashkia e këtij qyteti, një numër i konsiderueshëm pikash të rrezikshme, por që Autoriteti Rrugor Shqiptar, nuk ka marrë asnjë masë për riparimin e tyre.
Për fat të mirë, në furgonin me mallra të Beqir Muçës nuk kishte pasagjerë, sepse kjo mund të rezultonte fatale për jetën e tyre. Ndërsa nuk dihet, edhe sa jetë njerëzish do të duhet të humbin, që Autoriteti Rrugor Shqiptar të bëjë punën e tij, për garantimin e sigurisë rrugore.
Tv Klan
