Mbrëmjen e sotme, emisioni Opinion ka zhvilluar temën mbi pajisjen e përgjimit e cila me shumë gjasa do dominojë javën politike që sapo nisi.
E kthyer në një debat mediatik, në një debat legal, ku janë përfshirë Ministria e Brendshme, Prokuroria, Presidenti i Republikës, Parlamenti dhe partitë politike, përgjimi po dominohet më shumë nga misteri mbi pajisjen që e kryen atë dhe ekzistencën e saj.
Në vazhdën e këtij debati, deputeti i PS-së Alfred Peza tha se IMSI Catcher është përdorur vetëm për trajnim didaktik formative të dakordësuar nga policia e dy vendeve dhe nga Ministritë e Brendshme të dy vendeve përkatëse, në datat 3 dhe 4 mars të vitit 2016-të.
Peza bëri me dije se funksionet aktuale të konfigurimit të sistemit parashikojnë, skanim të rrjetit celularë mobile, të teknologjisë 2G, 3G dhe 4G me qëllim të identifikimit të saktë të antenave transmetuese, për një kërkesë të mëparshme të trafikut telefonik të operatorëve nga ana e autoriteteve gjyqësore. Identifikimin të telefonit celular në afërsi të sistemit të marrjeve të kodeve të IMSI-t dhe IMEI-t të vetë aparateve, kjo kryhet në mungesë të stimulimit të një antene radio falso që gënjen për pak sekonda telefonin duke e shmangur nga rrjeti origjinal. E thënë me fjalë të thjeshta, gjurmohet trafiku i thirrjeve, identifikohet IMSI dhe IMEI. Në asnjë rast nuk përgjohen telefonat audio apo tekstet e tyre të komunikuara nëpër rrejte të ndryshme sociale. Në asnjë rast nuk është përdorur nga Policia e Shtetit. Por vetëm është menaxhuar nga oficerë të specializuar italianë.
