Janë ende të paqarta rrethanat e humbjes së jetës së zhytësit Armando Hallvaxhiu, pasditen e sotme në shpellën e Haxhi Aliut pranë gadishullit të Karaburunit në Vlorë.
Nuk dihet ende nëse kemi të bëjmë me aksident nënujor apo humbje të jetës si pasojë e rrethanave shëndetësore.
Sporte të tilla me pushkë nënujore paraqesin rrezikshmëri nëse nuk je i trajnuar mirë.
Ajo që dihet deri më tani është se Hallvaxhiu praktikonte peshkimin nënujor, një sport shumë i përhapur në ujërat e jugut të Shqipërisë.
Ai ishte pjesë e shoqatës SpearFishing “Dajak Team” dhe postonte shpesh video nga momentet e zhytjes dhe të gjahut të tij që ishin speciet nënujore.
Vetëm pak ditë më parë, 34 vjeçari që ushtronte edhe profesionin e operatorit në një nga televizionet e njohura informative në Tiranë, kishte publikuar edhe një njoftim në faqen e tij në facebook, ku ftonte të gjithë të apasionuarit pas peshkimit nënujor ti bashkoheshin në muajin qershor një kursi dy ditor ku do të merrte pjesë edhe kampioni i botës në këtë sport, Marco Bardi.
Kurs që do të zhvillohej në Jalë por që ndarja e shpejtë nga jeta ndoshta do ti kushtohet tashmë veprimtarisë së tij si zhytës.
