Reshjet e dendura të shiut kanë shkaktuar shumë probleme në qytetin e Vlorës.
Dy zonat më të prekura janë lagjet “Pavarësia” dhe “24 Maji”, ku janë shkaktuar edhe përmbytje.
Mësohet se rreth 40 familje janë përmbytur vetëm në lagjen “24 Maji”.
“Kam tërë natën që merr batanijet, shtrydh andej, hidh andej”, shprehet një qytetar për kameran e Klan Neës, teksa ka përveshur tutat për të ecur mes ujit.
Ata shprehen se nuk ka punuar hidrovori dhe kjo është hera e dytë që përballen me përmbytje.
“Dje këtu në lagje, pusetat dolën mbi trotuar. Ore ke parë vullkan? Unë ujin nuk e kam nga shtëpia që kam bërë, e kam nga shteti. Shteti i ka në dorë këto”, tha një qytetar. “Mezi shpëtuam qenin”, shtoi ai, duke kërkuar një bot për të hequr ujin.
Një tjetër u shpreh se për shkak të situatës i është dashur të flejë jashtë bashkë me familjen.
Sipas tij, vajza është sëmurë nga situata.
“Është hera e dytë që përmbytemi, asnjë gjë nuk kemi marrë nga radha e parë. Fare, s’kemi marrë. Kam ndenjur tërë natën në kat të dytë te shkallët e katit të dytë, m’u plevitos vajza. Jashtë, tërë natën. Desh më iku vajza”, tha një tjetër qytetar.
Ndërkohë një grua, tha se është e detyruar të futet në banesë me çizme, si e vetmja alternativë. “S’kemi nga të kalojmë”, tha ajo.
Një tjetër tregon për dëmet që i ka shkaktuar uji që i ka hyrë brenda në banesë.
“M’u prish krevati i djalit e të tëra”, tha ajo.
Ndërkohë sa i përket lagjes “Pavarësia”, rruga “Gjergj Araniti” ishte ajo që u përmbyt. Atje, uji arriti deri në një metë lartësi duke rrezikuar bizneset përreth. Këtë të hënë, si pasojë e uljes së intensitetit të reshjeve, ky aks është i kalueshëm./tvklan
