Moti i keq bëhet akoma edhe më i padurueshëm në shtëpinë e Nazmie Hulit, në rrugën Erzeni në zonën e Bathorës, pasi është përmbytur e gjitha nga reshjet e shiut.
Përmes një video të dërguar në Opinion.al, ajo ka apeluar për ndihmë nga autoritetet për shkak të gjendjes së vështirë ekonomike në të cilën ndodhet.
Huli tregon se familja e saj përbëhet nga katër anëtarë, bashkëshorti dhe dy fëmijët e mitur, të cilët jetojnë vetëm me një përkrahje sociale.
Ajo bën me dije se uji ka plasaritur muret e banesës dhe çdo pajisje në shtëpi është e shkatërruar.
Huli në praninë e dy fëmijëve, apelon për ndihmë nga strukturat përkatëse, të cilët i fton për të verifikuar dëmet e shkaktuara nga përmbytja.
“Përbëhemi nga katër anëtarë, i zoti i shtëpisë nuk është këtu për momentin, ai ka dalë për të siguruar bukën e gojës për fëmijët. Unë bashkë me dy fëmijët jemi duke fshirë ujin, pasi ka hyrë uji brenda. Muret janë plasaritur gjithandej. Ju lutem hajdeni na verifikoni për ndonjë ndihmë urgjente”,- thekson zonja.
Ajo tregon se nuk është e aftë për punë për shkak të një operacioni të kryer në mushkëri, ndërsa thotë se gjendja ekonomike e familjes është në një situatë tepër të keqe, e cila jeton vetëm me ndihmën e një përkrahjeje sociale.
Edhe pse nuk ka marrë ende asnjë përgjigje, ajo vazhdon të shpresojë se dikush do t’a ndihmojë.
