Një ditë para seancës së jashtëzakonshme parashikuar për të miratuar pr/ligjin e Vetting-ut, Partia Demokratike ka depozituar në Kuvend disa amendamente për këtë pr/ligj, edhe pse ky i fundit u miratua vetëm me votat e mazhorancës në Komisionin e e Posacëm Parlamentar për Reformën në Drejtësi.
Veç 47 amendamenteve që depozituan me 23 Gusht në komision, demokratët kanë trajtuar në 28 amendamente të tjera, 7 çështjet që sipas tyre janë në kundërshtim me kushtetutën, duke zëvendësuar kështu nenet nga 26 tek 66 të draftit të miratuar.
Një prej çështjeve që Partia Demokratike sheh me shqetësim është roli që kanë organet e kontrollit të pasurive dhe të figurës së gjyqtarëve ILDKPKI dhe DSIK. Sipas demokratëve, ligji i miratuar në mbledhjen e fundit të Komisionit të Reformës në Drejtësi lejon kontrollin nga qeveria mbi këto organe, pasi kreu i ILDKPI emërohet me shumicë të thjeshtë nga Kuvendi, ndërsa ai i DSIK është në varësi të kryeministrit.
Po ashtu, pretendon opozita, edhe organet e reja si Komisioni i Pavarur i Kualifikimit, Komisionerët Publikë apo Kolegji i Apelimit që krijohen nga Kushtetuta e miratuar më 22 Korrik, vendosën nën mbikqyrjen dhe kontrollin e qeverisë sepse telekomunikimet dhe të ardhurat financiare të anëtarëve të tyre kontrollohen në mënyrë periodike nga agjenci në varësi të qeverisë.
Tv Klan
