Momente frike ka patur pasditen e djeshme në New York, kur një makinë goditi disa demonstrues në Manhattan të cilët po merrnin pjesë në një protestë të organizuar nga lëvizja “Black Lives Matter”. Të paktën gjashtë të plagosur u dërguan me urgjencë në spital, megjithëse asnjëri prej tyre nuk paraqiti rrezik për jetën.
Shoferja, një grua 52-vjeçare, u arrestua dhe u mor në pyetje së bashku me vajzën e saj 29-vjeçare e cila ishte me të në makinë. Frika e autoriteteve ishte menjëherë ajo e një sulmi të paramenduar me motiv racor.
Por punonjës nga Departamenti i Policisë së Nju Jorkut shpjeguan se vazhdon hetimi dhe aktualisht janë të paqarta arsyet e kësaj ngjarjeje.
Dëshmitarët tregojnë se si një BMW e zezë u ndalua në një kryqëzim nga protestuesit që protestonin paqësisht në mes të rrugës në lagjen Murray Hill në East Side të Midtoën Manhattan. Gruaja që drejtonte mjetin tha se ishte e rrethuar dhe se dikush kishte filluar ta godiste makinën e saj.
Në atë moment ajo shkeli papritur gazin duke goditur njerëzit që ishin përpara makinës dhe kalimtarët që po kalonin rrugën. Pasojat e këtij veprimi mund të ishin shumë më serioze dhe të rënda. Skenat e kaosit dhe panikut shoqëruan këtë moment, ndërsa njerëzit bërtisnin dhe iknin, disa nga frika e një sulmi. Në fund, me xhamin e thyer nga një prej njerëzve që u goditm makina ndali në një zonë të izoluar, ku mbërriti policia. Hetuesit tani do të përcaktojnë nëse ka apo jo arsye racial pas incidentit./Opinion.al
