Alvaro Morata do të jetë sulmuesi titullar i Spanjës në ndeshjen me Shqipërinë por trajneri De Biazi do të kishte qenë më i qetë nëse Diego Kosta nuk do të udhëtonte me iberikët drejt vendit tonë. Sulmuesi do ta nisë ndeshjen nga stoli, për të hyrë në fushën e lojës nëse nevojitet në pjesën e dytë, por ai shumë mirë mund të kishte munguar në këtë duel, pasi një natë më parë, në sfidën kundër Italisë, iu afrua shumë kartonit të kuq, që nuk është një risi për të.
Lojtari ishte ndëshkuar me të verdhë gjatë ndeshjes, por në minutën e 66-të, pas një pozicioni jashtë loje të sinjalizuar nga vijërojtësi, goditi topin me forcë, një gjest reagimi i cili zakonisht ndëshkohet me karton të verdhë dhe që do të kishte sjellë largimin e parakohshëm nga fusha e lojës. Gjyqtari Feliks Brysh vendosi ta falte, ndërsa Lopetegui e ndërroi menjëherë, i ndërgjegjshëm se mund të humbiste shërbimet e sulmuesit për sfidën e radhës.
Por shokët e skuadrës nuk i kanë kursyer kritikat ndaj lojtarit. Pamjet televizive treguan momentin kur Diego Kosta u kthye në stol dhe portieri Pepe Reina iu drejtua menjëherë me fjalët “Mund të të kishte nxjerrë me karton të kuq, e di apo jo?”.
Gjithsesi, gjatë ditës së sotme, gjithçka dukej e harruar, edhe për faktin se sulmuesi spanjoll festoi në grumbullim me skuadrën 28-vjetorin e tij. Në hotelin e përfaqësueses nuk mungoi torta tradicionale, ashtu si edhe një dhuratë simbolike nga shokët e skuadrës.
