Ministri i Drejtësisë, Petrit Vasili, i pyetur nga gazetari Blendi Fevziu se si u imponua Edi Rama për shkarkimin e Manjanit, ka deklaruar se nuk ka pasur asnjë imponim.
Vasili tha se kryeministri nuk ka marrë atë se çafarë ka kërkuar e ka dashur.
Sipas tij, ai ka ngritur disaherë këtë shqetësim për këtë problematikë dhe mbi një keqkuptim të vazhdueshëm që nuk po gjente rrugën e pajtimit.
Petrit Vasili ka shpjeguar deklaratën e Luan Ramës bërë dy ditë më parë kur tha se, kishte dy zgjedhje ose shkarkimin e Manjanit ose shkarkimin e Ramës.
Vasili u shpreh se deklarata ishte se pas konfliktit mes Manjanit dhe Ramës prevalon propozimi i Kryeministrit si drejtues i qeverisë.
I pyetur nëse qëndrimet e ish-ministrit të Drejtësisë janë qëndrime të LSI, Vasili tha se ato janë qëndrime personale.
Për kanabizimin e vendit, Vasili tha se ka një shqetësim që nuk është më i lokalizuar por ka marrë edhe shqetësimin e mediave botërore.
“Është një problem që duhet t’i dalim ballas, nuk mund t’i ikim problemit”, tha Vasili.
I pyetur mbi deklaratën “paralajmëruese” për deputetët e LSI-së që të kenë kujdes mos u fut drogë në makinë, Vasili e mohoi një gjë të tillë.
I ngacmuar nga Blendi Fevziu, i cili e pyeti nëse “është e vërtetë se keni lënë biçikletën për të lëvizur me makinë për të shmangur futjen e drogës”, ai dha këtë përgjigje:
“Nuk kam bërë një argument të tillë. Po të kisha një qëndrim të caktuar do ta kisha bërë publik.”
Vasili pranoi gjate intervistes ne “Opinion” ne Tv Klan, se Klement Balili eshte propozuar drejtor per Transportin ne Sarande nga LSI.
Fshihet Klement Balili nga LSI?
Personalisht nuk e kam njohur kurrë këtë njeri. Sa i takon komenteve, përgjigja është qëndrimi i LSI, kërkesa e Metës dhe deklaratat e Manjanit.
Ka qenë zyrtar i propozuar nga ne, pa pasur asnjë rekord kriminal.
Por ka qenë i dënuar në vitin 2006-2007?
Nuk e di, ka qenë njeri i lirë. Nuk ka qenë pjesë e strukturave të LSI-së.
A ka të afërm të tij në LSI?
Nuk ka asnjë të afërm.
A është përgjuar Meta nga Policia?
Nuk dua të merrem me këtë çështje. Por kush do që e bën është vepër e rëndë kriminale. Përgjimi i bërë në mënyrë të paligjshme është faj penal.
Kush janë ministrat që flinin e “Santa Quaranta”?
Nuk dua të merrem me këtë lloj prononcimi, të këtij niveli
Nuk u bëtë kurioz që ta pyesnit z. Manjani?
Nuk kam as kuriozitetin më të vogël!
A keni deklaruar se punonjës policie mund t’i fusin përfaqësuesve të LSI drogë në makinë?
Vasili: Nuk komentoj lajme mediatike, nuk dua të flas për një çështje të tillë. Është tjetër gjë çfarë them unë në takimet e strukturave të LSI-së.
Cili është vlerësimi juaj për Tahirin?
Vasili: Nuk kam të drejtë të bëj vlerësime, pasi me kushtetutë këtë të drejtë e ka kryeministri, duke qenë ministër nuk mund ta bëj një vlerësim.
Keni kritikuar reformën në shëndetësi?
Vasili: Disa objektiva mund të ishin riformuluar më mirë. “Shëndetësia Falas” mund të ishte më modeste dhe kam kërkuar një formulim.
Thonë se LSI voton si mazhorancë dhe flet si opozitë?
Vasili: Në rast se unë ngre një shqetësim fjala bie për reformën në shëndetësi. Në rast se ju e mendoni qeverisjen si një masoneri që i konsumon të gjitha brenda atëherë do ishte fundi. Nisma apo ide për të përmirësuar qeverisjen do të thonë t’i shërbejnë bashkëqeverisjes.
A do veprojë ashpër ligji për përfshirjen e personave me precedentë kriminalë, por edhe struktura të tjera?
Vasili: Është jetike për të ardhmen e zgjedhjeve për të mos ricikluar problematikat e këtij parlamenti. Dekriminalizimi është një proces pastrues por edhe na ka errësuar në sytë e opinionit ndërkombëtar edhe e ka shëndoshur politikën shqiptare. Dekriminalizimi është akoma në tavolinë.
Cila është përgjegjësia juaj si LSI?
Vasili: Qëndrimi do të jetë i prerë, do të bëjmë të gjithë verifikimin deri në një, për pastërtinë e të gjitha figurave që do të kandidojnë.
