Noizy i OTR nuk e ka mbyllur sherrin me reperat e Babastars të nisur pasditen e djeshme në qendër të Prishtinës. Ndonëse mbeti i plagosur lehtë në kokë, ai ka vijuar koncertin e parashikuar në Ferizaj, aty ku nuk i ka kursyer provokimet dhe sharjet nga më të rëndat për anëtarët e Babastars. Sipas Klan Kosova, koncerti ishte i stërmbushur me fansa të këngëtarit nga Shqipëria. Madje në një video të siguruar, Noizy dëgjohet duke kënduar këngën “Jena Mbretër”, këngë e bërë disa vite më parë kundër anëtarëve të Babastars. Pjesën F*** Babarecords, Noizy e rikthen mbi katër herë, duke marrë edhe mbështetjen e publikut.
SHERRI
Sherri mes dy grupeve ndodhi pasditen e djeshme përballë ‘Sëiss Diamond Hotel’ në Prishtinë, teksa Noizy qëndronte në kafe. Ky i fundit është provokuar nga Skivi i Babastars, siç thonë dëshmitarët, ndërsa ai ka thirrur më pas anëtarët e tjerë të grupit. Nga përplasja Noizi është plagosur, ndërsa pak më vonë u shtrua në klinikën e Ortopedisë ku edhe iu hoq një plumb. Ndërkohë policia e Kosovës ka arrestuar reperin e Babastars Ylber Abdullahu – i njohur si Cozman, vëllain e tij dhe mikun e tij të afërt Albert Krasniqi. Përveç Noizyt në incidentin e armatosur në qendër të Prishtinës është plagosur edhe shoku i tij, i njohur me nofkën “Varrosi”. Historia e konflikteve mes OTR dhe Babastars ka kohë që ka nisur. Kohë më parë reperi Noizy u përlesh me anëtarët e labelit kosovar në Zvicër, ndërsa vazhdimisht nuk kanë munguar ‘thumbat’ mes tyre përmes këngëve të publikuara. Armiqësia e tij me Cozman është thelluar kur në një intervistë reperi nga Shqipëria, Noizy i përmend ish të dashurën, këngëtaren Tuna, me të cilën, linte të nëkuptohej se kishte pasur marrëdhënie seksuale.
