Kontrolli për të parandaluar përhapjen e Covid-19 nga autoritetet greke ka shkaktuar radhë të gjata automjetesh që presin të kalojnë pikën kufitare të Kakavijës.
Shqiptarët të cilit ishin kthyer në atdhe për të kaluar pushimet janë përballur me radhë të gjata të kalimit në pikën kufitare të cilat vijojnë prej ditës së djeshme dhe kanë arritur në disa kilometra.
Autoritetet greke njoftuan se do të pranojë vetëm 750 qytetarë në ditë dhe se ata duhet të kenë bërë tamponin 72 orë para se të kalojnë pikën kufitare në Kakavijë. Shqiptarët që presin në radhë thonë se ky informacion nuk është bërë i ditur më parë nga pala greke.
Nga pamjet e siguruara nga Abc News shikohen se qytetarë të shumtë shqiptarë sëbashku me familjet e tyre presin në radhë për të kaluar kufirin, për tu nisur drejt vendit të tyre të punës në shtetin fqinj.
Për shkak të temperaturave të larta shihet se qytetarët kanë dalë jashtë makinave të tyre dhe qëndrojnë poshtë pemëve duke pritur në radhë për kalimin e kufirit.
Situata vijon prej më shumë se 24 orësh ndërkohë që këta qytetarë do të duhet të vetëkarantinohen për 7 ditë pasi të mbërrijnë në shtëpitë e tyre në Greqi./Opinion.al
