Policia e Shkodrës ka zvilluar një operacion policor për goditjen e një rasti të trafikimit të lëndëve narkotike.
Në një njoftim për mediat, autoritetet bëjnë me dije se në bashkëpunim me forcat “Shqiponja” bazuar në informacionet paraprake u ndalua në fshatin Bratosh një automjet pa targa që dyshohej se po transportonte lëndë narkotike.
Por në momentine ndërhyrjes, njëri nga pasagjerët, duke përfituar edhe nga errësira, ka mundur të largohet, por është identifikuar dhe është shpallur në kërkim.
Ndërkohë që drejtuesi i mjetit dhe pasagjeri tjetër janë vënë në pranga. Në flagrancë u arrestuan Xh. Z., 20 vjeç, A. R., 22 vjeç, banues në Koplik.
Policia në mjet gjeti dhe sekuestroi një pako me kanabis me peshë 643.2 gramë, 2 aparate celulare dhe 1 automjet.
Materialet procedurale iu referuan Prokurorisë pranë Gjykatës së Shkallës së Parë Shkodër, për veprat penale “Prodhimi dhe shitja e narkotikëve”, kryer në bashkëpunim, “Mosbindja ndaj urdhrit të punonjësit të policisë së rendit publik” dhe “Pastrimi i produkteve të veprës penale ose veprimtarisë kriminale”./Opinion.al
