Libia është futur në kaos nga konflikti i brendshëm civil mes forcave të qeverisë së kryeministrit Fayez al-Sarraj dhe atyre të marshallit Khalifa Haftar.
40 kadetë mbetën të vdekur pas një sulmi ajror në akademinë ushtarake në Tripoli. Bombardimi u raportua se ishte urdhëruar nga gjenerali Haftar por ai e mohoi diçka të tillë duke pretenduar se shpërthimi ka ardhur si pasojë e një shpërthimi brenda ambienteve të akademisë.
Por një video e publikuar tregon momentet kur kadetët janë rreshtuar në oborrin e akademisë dhe papritmas ai përfshihet nga flakët të cilat duket se nuk kanë ardhur nga brenda akademisë.
Ndërkohë në Libi forcat e marshallit Khalifa Haftar hynë në qytetin bregdetar të Sirte, deri më tani në duart e qeverisë së Fayez al-Serraj.
Përshkallëzimi i situatës ka bërë që BE të anulojë misionin për ndërmjetësim politik të konfliktit. Përfaqësuesi i Lartë i BE-së, Josep Borrell, bashkë me ministrat e jashtëm të Francës, Gjermanisë, Britanisë së Madhe dhe Italisë duhej të kishin mbërritur sot në kryeqytetin Libian, por “çështjet e sigurisë” e kanë bërë udhëtimin të ndërlikuar dhe të rrezikshëm.
Kjo situatë përkon gjithashtu edhe me vendosjen e trupave turke në Libi të cilat mbështesin qeverinë e al-Serraj i cili ka gjithashtu përkrahjen e OKB-së. Ndërsa marshalli Khalifa Haftar mbështetet nga Rusia, Emiratet e Bashkuara Arabe dhe Egjipti. /Opinion.al
https://www.youtube.com/watch?time_continue=45&v=el2T4NQl3iw&feature=emb_title
