Koha shtesë e ndeshjes së zhvilluar pasditen e së dielës mes Valencia-s dhe Barcelona-s ka qenë e mbushur me emocione dhe polemika, me skuadrën katalanase që ka fituar takimin 3-2, pas një penalltie të dhënë nga arbitri në minutën e fundit. Një vendim ky që ka acaruar tifozët vendas, të cilët kanë hedhur objekte të ndryshme drejt lojtarëve të Barcelona-s, që ishin duke festuar. Pasi ka parë se disa nga këto objekte kanë goditur Neymar dhe Luis Suarez, Lionel Messi ka shpërthyer kundër tifozëve të “Mestalla”-s.
“La concha de sus madres, hijos de puta”, ka qenë shprehja argjentinase që ylli i Barçës i ka drejtuar tifozëve dhe që është kapur nga telekamerat. Një frazë që në vija të përgjithshme përkthehet “bijë k…”, edhe pse shprehja e përdorur nga Leo është pak më vulgare. Shoku i skuadrës i Messi-t, Javier Mascherano, është ndëshkuar me karton të kuq në një ndeshje kundër Eibar të luajtur në tetor të 2015-ës, për shkak se ka përdorur të njëjtën shprehje, por në atë rast arbitri mendoi se i ishte drejtuar atij.
