Mijëra shqiptarë zbarkuan mbrëmë në rrugët e Londrës për të festuar ditën e Pavarësisë.
Mediat britanike shkruajnë se rrugët rreth Westminsterit u bllokuan nga turma që valëvitnin flamuj shqiptarë dhe ndeznin fishekzjarre, me makina luksoze Audi, Mercedes dhe makina sportive që shiheshin duke lëvizur duke i rënë borive.
Daily Mail shkruan se disa njerëz u panë duke valëvitur flamuj teksa qëndronin sipër automjeteve në lëvizje, ndërsa qarkullimi i rregullt në përpjekje për të kaluar nëpër kryeqytet u ndal pasi tubimi shkaktoi mbylljen e rrugëve.
Policia Metropolitane konfirmoi se arrestoi shumë njerëz pasi disa prej tyre hodhën fishekzjarre drejt turmës, ndërsa të tjerë dyshohet se hodhën shishe drejt oficerëve.
Policia më vonë vlerësoi se ‘rreth 1000 njerëz’ ishin mbledhur në rrugën Belvedere për të marrë pjesë në këtë tubim si pjesë e demonstratës, me mbylljen e rrugës midis York Road dhe Concert Hall Approach.
