Policia e Shtetit përmes një komunikate për mediat ka dhënë disa të dhëna për sasinë më të madhe të drogës të kapur ndonjëherë në vend. Ndryshe nga çraportuam në mëngjes, nuk janë 10 ton por plot 11.6 ton kanabis të kapura në fshatin Pagri të Përmetit. Por për gjithë këtë sasi të madhe droge, deri më tani janë arrestuar dy çobanë delesh dhe kryeplaku që akuzohet se pse s’ka raportuar.
Në njoftimin e policisë thuhet se “droga u gjet dhe sekuestrua në një nga tre ish-depot e rezervave të shtetit në fshatin Pagri të Përmetit. Sasia pasi u peshua doli 11 650 kilogramë lëndë narkotike e dyshuar Cannabis Sativa. Në operacion mësohet se ka marrë pjesë Shërbimi për Çështjet e Brendshme dhe Ankensat në Ministrinë e Punëve të Brendshme . Nuk dihet ende pse është përfshirë SHKB në këtë operacion dhe a ka policë të përfshirë në trafikun e drogës.
Janë ndaluar Rustem Muçelli, 51 vjeç, banues në fshatin Pagr dhe Eqerem Aliu, 60 vjeç banues në fshatin Pagri dhe është shpallur në kërkim Ismail Saliu, 61 vjeç. Sipas policisë, personat e lartpërmendur janë ndaluar pasi kishin marrë në përdorim depot për të magazinuar ushqim për bagëtitë e tyre. Po kështu është ndaluar kryeplaku i fshatit Pagri, Koço Zaimaj , 58 vjeç pasi nuk ka raportuar për depot e drogës.
“Materialet do ti kalojnë Prokurorisë Pranë Gjykatës së Shkallës së Parë Përmet për hetim të mëtejshëm në ngarkim të shtetasve Rustem Muçelli, Ismail Saliu dhe Eqerem Ali, për veprën penale “Prodhim dhe shitje të narkotikeve”, e kryer në bashkëpunim të parashikuar nga neni 283/2 i Kodit Penal. Si dhe në ngarkim të shtetasit Koço Zaimaj për veprat penale “Shpërdorimi i Detyrës ” dhe “Moskallëzimi i krimit” të parashikuara nga neni 248 dhe 300 i Kodit Penal”, thuhet në njoftimin e policisë.
Sakaq, policia thotë se kanë nisur verifkimet për të parë nëse ka implikim apo shpërdorim detyre të punonjësve të policisë së Përmetit në lidhje me këtë ngjarje. /Opinion.al
