Një gjykatë në Itali ka dënuar me 18 vite burg Arjan Ziun, 50 vjeç dhe nga me nga 17 vite e katër muaj vëllain e tij Mikel Ziu, 53 vjeç dhe dy djemtë Rudi, 26 dhe Antonio, 19 vjeç.
Katër shqiptarët janë dënuar në Itali për vrasjen e Roberto Tizit në qershor të vitit 2015 në Teramo, ndërsa po kthehej në shtëpi bashkë me bashkëshorten e tij.
Gjyqtari dha një vendim të tillë ndërsa prokuroria kishte kërkuar një dënim prej 30 vitesh burg për katër të akuzuarit.
Gjithashtu, gjykata ka dhënë dhe një dënim me 30 mijë euro si dëmshpërblim për prindërit te viktimës.
Roberto Tizi u vra para shtëpisë së tij me dy plumba pistolete nga Arjan Ziu. Plumbi i parë u qëllua kur ndodhej ende në makinë.
Shqiptarët i kishin zënë pritë, ndërsa pasi u qëllua me plumba dhe ndodhej përtokë, ata e kanë goditur me me shkelma në kokë.
Sipas rindërtimit të ngjarjes nga hetuesit, vrasja ishte një hakmarrje për sherrin që viktima kishte pasur disa orë më parë me Arjan Ziun.
Pasi u kapën nga policia, Ziu pranoi vrasjen duke përjashtuar përfshirjen e tre të tjerëve në vrasje.
