Teksa Prishtinën po e viziton zyrtarja e lartë e Bashkimit Europian, Federica Mogherini, qindra qytetarë të Kosovës janë mbledhur për të protestuar në shesh. Protesta ishte thirrur ditë më parë dhe bëhet në mbështetje të liderit të AAK i cili mbahet peng në Francë prej dy muajsh për shkak të një urdhër -arresti serb. Disa herë Ramush Haradinaj ka deklaruar se ndalimi i tij është politik dhe në dëm të Kosovës.
Protesta është organizuar nga Aleanca për Ardhmërinë e Kosovës dhe është përkrahur edhe nga partitë tjera opozitare dhe shoqatat e dala nga lufta e UÇK-së.
Që nga ndalimi i Haradinajt më 4 janar nga policia franceze, në disa vende evropian ku ka qytetarë shqiptarë, është protestuar për lirimin e ish-kryeministrit Haradinaj.
Një gjykatë në Francë ka shtyrë vendimin për kryetarin e AAK-së, Ramush Haradinaj, deri më 6 prill si “një afat shtesë për t’i shqyrtuar argumentet shtesë të deponuara nga Prokuroria Speciale e Serbisë”.
Pas shtyrjes së verdiktit për rastin Haradinaj, kanë reaguar institucionet dhe përfaqësuesit më të larta të Kosovës, presidenti, Qeveria, kryetari i Kuvendit, si dhe partitë politike në pushtet dhe opozitë.
