Partizani do të luajë sonte, në orën 20:15, në “Elbasan Arena”, ndaj kampionëve të Austrisë. Një përballje shqiptaro-austriake në rang klubesh, teksa pak muaj më parë ky duel u “vu në skenë” edhe nga kombëtaret tona (miqësore). 35 vite më parë, Partizani triumfonte ndaj një kundërshtari të këtij vendi, po në Kupat e Europës. Më 30 shtator 1981, “demat e kuq”, që drejtoheshin asokohe nga trajneri Bejkush Birçe, luanin ndaj Austrisë së Vjenës në “Qemal Stafa” dhe fitonin minimalisht, 1-0, me gol të shënuar nga Haxhi Ballgjini 31’
Bëhet fjalë për raundin e parë të Kupës së Kampioneve, sot Liga e Kampioneve, në edicionin 1981-1982. Në radhët e Partizanit luante si futbollist edhe Sulejman Starova, sot këshilltar i presidentit Gaz Demi, pjesëtar i stafit drejtues të 15 herë kampionëve të Shqipërisë. Vendin e Alban Hoxhës, që mrekulloi në Budapest me pritjet e tri penalltive dhe ekzekutimin alla “Panenka” të 11-metërshit të parë prej tij, e zinte asokohe një tjetër portier i madh, legjenda e kuqe, Perlat Musta. Drejtori i Përgjithshëm i Partizanit aktualisht, Genc Tomori, po ashtu, ishte futbollist në atë ndeshje, në fitoren 1-0 ndaj kryeqytetasve vjenezë. Kësaj here do të ketë përballë po kampionët e Austrisë, por jo Austrinë e Vjenës, që ishte mysafire para pak ditësh në “Elbasan Arena”, ku fitoi 4-1 ndaj Kukësit, në kthimin e turit të dytë të Ligës së Europës. FC Red Bull Salzburg është një tjetër skuadër me emër në Austri, që do të provojë “brirët e demave të kuq”, të drejtuar nga trajneri italian, Adolfo Sormani.
