Tre të rinj, të moshës nga 22 deri në 17 vjeç humbën jetën tragjikisht në Adriatik të Kurbinit mesditën e djeshme. Ata kishin konsumuar një drekë në Lagunën e Patokut dhe kalonin në rrugën e fshatit për të dalë në autostradë. Në një kthesë të rrezikshme ku kanë vdekur edhe tre persona të tjerë më herët, makina doli nga rruga dhe përfundoi në kanal. Banorët e zonët shprehen se nëse nuk vihet dorë në këtë rrugë, do të vazhdojë të ketë viktima.
Për ironi të fatit, jo shumë larg vendit të aksidentit ndodhet një kryq i madh dhe banorët e kanë emëruar “zona e kryqit”.
Një banor i zonës së Adriatikut, thotë se makina ka qenë me shpejtësi të madhe. Drejtuesi 22 vjecar i mjetit, Juli Margjini e ka humbur kontrollin, dhe ka përfunduar në kanal, pasi rruga nuk ka asnjë parametër sigurie.
“Kthesa në këtë pikë të rrugës është e panevojshme. Ura është e ngushtë, mungojnë bordurat anësore dhe sinjalistika. Edhe jetë të tjera do ikin këtu, siç kanë ik të gjashtë. Tre përpara dhe tre dje”, u shpreh një banor tjetër.
Në aksidentin fatal të Kurbinit humbën jetën Juli Margjini, 22 vjec me banim në Kombinat të Tiranës, Simon Kaza e Bert Marku 20 dhe 17 vjec të dy banues në fshatin Adriatik të Kurbinit.
