Mbrëmjen e sotme, emisioni Opinion ka zhvilluar temën mbi pajisjen e përgjimit e cila me shumë gjasa do dominojë javën politike që sapo nisi.
E kthyer në një debat mediatik, në një debat legal, ku janë përfshirë Ministria e Brendshme, Prokuroria, Presidenti i Republikës, Parlamenti dhe partitë politike, përgjimi po dominohet më shumë nga misteri mbi pajisjen që e kryen atë dhe ekzistencën e saj.
Në vazhdën e këtij debati, ish-Drejtor i SHIK, Fatos Klosi tha se në doganat shqiptare çdo pajisje e ka mjaft të lehtë të kalojë.
“Po të vihet re ajo pajisje, duket mjaft qartë si një LapTop, ajo me atë antenë nuk mund të realizojë dot ato çudira që thoni juve, çdo antenë celulari e ka një antenë të ngjashme, për të pasur një komunikim të kufizuar, këto duket se janë krakteristika reklamash, është një reklamë që keni gjetur në internet dhe kaq”.
Klosi tha se të tilla pajisje mund të futen në vendin tonë mjaft kollaj, madje në doganë ato shkruajnë aparat, sipas tij, dogana kërkon vetëm TVSH dhe nuk është e interesuar fare për të kontrolluar funksionin e një pajisje që media këto ditë ka ndezur debatin publik.
