Kjo video tregon momentin e arrestimit nga policia irakiane, të një fëmije 13 -vjeçar i cili mbante një jelek ekspolziv.
I mituri, i veshur me një fanelë të ekipit të Barcelonës, u kap në flagrancë përpara se të aktivizonte lëndën shpërthyese. Mediat e huaja raportojnë se fëmija 13-vjeçar po planifikonte të vetëhidhej në erë pranë një xhamie shiite në qytetin Kirkuk, në veri të kryeqytetit Baghdad.
Forcat irakiane arritën ta ndalojnë në kohë dhe më pas kryen shpërthimin e telekomanduar të jelekut eksploziv.
Arrestimi i fëmijës kamikaz vjen një ditë pas masakrës në Turqi, ku një tjetër i mitur u vetëhodh në erë gjatë një dasme në qytetin me shumicë kurde Gaziantep, duke shkaktuar 51 të vdekur, 29 prej tyre fëmijë, dhe më shumë se 100 të plagosur. Presidenti turk Rexhep Taip Erdoan tha se pas sulmit terrorist qendron Shteti Islamik.
Qyteti Gaziantep, pranë kufirit me Sirinë, është i njohur për ekzistencën e disa celulave terroriste të ISIS. Në lindje të vendit ushtria turke po zhvillon prej kohësh edhe një konflikt të armatosur me militantët e PKK-së./ Tv Klan
