Ambasadori rus në Ankara, Andrei Karlov, është qëlluar për vdekje, ndërsa ishte duke vizituar një galeri arti, raportojnë mediat turke.
Mësohet se janë plagosur edhe disa persona të tjerë, ky sulm vjen një ditë pas protestave në Turqi, në lidhje me ndërhyrjen ushtarake të Rusisë në Siri.
Sipas TV rus, ambasadori kishte marrë pjesë në një ekspozitë të quajtur: “Rusia, si shikohet nga turqit”.
Më pas, është bërë me dije se vrasësi u qëllua për vdekje nga policia.
Referuar pamjeve të para, shikohet Karlov duke mbajtur fjalimin, ndërsa të shtënat dëgjohen nga jashtë.
Kamera tërhiqet pas, duke treguar një person të veshur me kostum të zi dhe kravatë, ai përshëndet dhe në dorë mbante një pistoletë.
Ai mund të dëgjohet duke bërtitur: “Mos të harrojmë Aleppo-n, mos harroni Sirinë, ndërsa përdor frazen islamike “Allahu Ekber” (Zoti është i madh).
Zëdhënësi i departamentit të shtetit në SHBA, John Kirby, tha se zyrtarët amerikanë ishin në dijeni të raporteve në lidhje me sulmin ndaj ambasadorit.
“Ne e dënojmë këtë akt dhune, pavarësisht arsyes së saj”, tha ai. “Lutjet tona shkojnë për të dhe familjen e tij”.
Pak ditë më parë, ka pasur protesta në lidhje me luftën në Siri, ndërsa në nivel politik, qeveria turke dhe ruse kanë bashkëpunuar në operacionin e armëpushimit në Aleppo, bën me dije korrespondenti i BBC-së, Mark Lowen.
Është shumë herët të dihen motivet e sulmuesit, i cili ende nuk është identifikuar. Të dhënat paraprake, tregojnë, se ai ka hyrë në galerinë e artit, duke përdorur një kartë identiteti të policisë.
