“Një ëndërr e hapur për botën”. Pas zërave të javëve të kaluara, me këtë slogan Barcelona ka vendosur të ngrejë siparin mbi rindërtimin e stadiumit të saj. Punimet në “Camp Nou” do të fillojnë në muajt e parë të 2017ës dhe impianti pritet të jetë gati më 2012in kur skuadra “blaugrana” do të mund të luajë përballë 105.000 spektatorëve. Presidenti Josep Bartomeu, gjatë prezantimit të stadiumit, ka specifikuar se: “Do të jetë transparent dhe do të mund të shihet i gjithë qyteti, nga deti në mal”.
“Camp Nou” është përbërësi kryesor i projektit “Espai Barça” (Hapësira Barça) për të cilin klubi katalanas do të investojë 600 milionë euro brenda 2022it. “Kemi ndërmend të financojmë punime duke shitur të drejtat e sponsorizimit të impianteve, – ka shpjeguar Bartomeu duke ju referuar ndërtesës që ndodhet afër stadiumit, ‘Palau Blaugrana’. – Punimet nuk do të fillojnë nëse nuk do të arrihet një marrëveshje për këtë aspekt. Kemi filluar të flasim me disa sponsor, po punojmë me një kompani të specializuar”.
Presidenti ka saktësuar se këto investime nuk do të vënë në rrezik pasurinë e klubit dhe as planifikim ekonomik dhe sportiv të sezoneve të ardhshme. Barcelona do të përfitojë nga periudhat ku nuk do të ketë aktivitet sportiv për të hapur kantieret më të rëndësishme, por do të zhvillohen punime edhe gjatë sezonit, por që nuk do të ndikojnë te skuadra dhe tifozët.
Do të ketë një reduktim të vogël të kapacitetit për disa muaj, megjithatë numri i vendeve nuk pritet të bjerë nën 95.150. Stadiumi do të ketë një zonë të dedikuar për Johan Cruyff, i cili është ndarë nga jeta marsin e kaluar. drejtuesit katalanas nuk kanë dashur të zbulojnë më shumë detaje në lidhje me këtë homazh sepse “do të prezantohet në ditët në vazhdim. E meriton si të gjithë lojtarët e tjerë të rëndësishëm. Duhet të pranojmë se nuk do të ishim këta që jemi sot nëse nuk do të ishte për Johan Cruyff”.
