Çelsi i Antonio Kontes ka pësuar një humbje tronditëse në shtëpi në javën e 30 të kampionatit anglez. Por ajo që e bën të veçantë këtë humbje është fakti se nuk ia ka shkaktuar një rival për titull apo për objektiva prestigjiozë, por Kristal Palas, një skuadër që lufton për mbijetesën në elitën e futbollit anglez.
Londinezët dukej se do të vazhdonin serinë e tyre pozitive në kampionat pasi kaluan në avantazh që në minutën e 5 të ndeshjes me anë të Fabregas. Por vetëm 6 minuta më vonë, situata ishte përmbysur plotësisht pasi Zaha dhe Benteke kishin shënuar në portën e bluve ku Kurtua ishte gjithmonë në alarm sapo dy sulmuesit kishin topin në këmbë.
Çelsi provoi në të gjitha mënyrat të shënonte por Kristal Palas u mbrojt me rregull, ndërsa në rastet e krijuara, Diego Kosta dhe Hazard nuk arritën të gjenin një mënyrë për të kaluar portierin Henesi. Ndaj Kristal Palas mori fitoren e 4-t radhazi që e nxjerr nga zona e ftohtë e klasifikimit, ndërsa duket se ka hapur edhe luftën për titull.
Totenhemi ngushtoi në 7 pikë diferencën nga Çelsi me fitoren 2-0 në fushën e Bërnlit dhe për momentin duket si rivali më serioz që u ka mbetur londinezëve në këtë garë. Mançester Junajtid, u ndal në shtëpi në barazim pa gola edhe pse dominoi kundër Uest Bromuiç. Ndërsa bie në sy fitorja e 4-t radhazi e Leisterit të Shekspir që duket i pandalshëm dhe ka gjetur përsëri Vardin, i cili dukej i humbur nën drejtimin e Ranierit.
