Liverpool ka pësuar një tjetër humbje në Premier League duke vazhduar ecurinë tepër negative pas humbjes 2:0 nga Hull City në “Anfield”. Ishte një paraqitje tepër zhgënjyese nga djemtë e Jurgen Klopp ndërsa Hull me një prapavijë të hekurt dh një kundërsulm të shpejtë arritën të ndëshkonin Të Kuqtë duke i shkelmuar jashtë luftës për titull.
Ndeshja filloi ashtu siç pritej, me vendasit të vendosur në sulm dhe miqtë me një prapavijë tepër të tërhequr në kërkim të një mrekullie tjetër si kundër Manchester United dhe me Abel Hernandez të vetëm në sulm i cili mundohet të tërheqë skuadrën në kundërsulme.
Sfida nuk fal bukuri dhe është e pamundur për Të Kuqtë të dalin në lojën e tyre me aq shumë mbrojtës kundërshtarë që kanë bllokuar rrugën drejt portës. Si pasojë, rastet për gol mungojnë dhe mundësitë e vetme të vendasve janë sporadike dhe jo kërcënuese. Por surpriza vjen në minutat e fundit të pjesës së parë.
Teksa dukej sikur skuadrat do të riktheheshin në dhomat e zhveshjes me rezultatin e pandryshuar, miqtë befasojnë duke shënuar golin e avantazhit në mundësinë e parë që i jepet. Pas një goditje këndi Mingolet tregon edhe njëherë pse kritikohet nga e gjithë Anglia duke bërë një dalje të pamenduar dhe tepër të gabuar duke i falur golin kundërshtarëve.
N’Diaye ishte në momentin e duhur në vendin e duhur duke shtyrë topin në rrjetë pa shumë probleme. Klopp mundohet të bëjë diçka në pjesën e dytë duke futur në fushë Wijnaldum e më pas Sturridge por Liverpool megjithëse luan të gjithë ndeshjen në gjysmëfushën kundërshtare nuk arrin të zhbllokojë mbrojtjen e hekurt të Hull City. Mundësi të mirë kishte Coutinho por goditja e tij shkon jashtë kuadratit.
Me kalimin e minutave vendasit duken të frustruar dhe kjo i jep mundësi miqve të shfrytëzojnë kundërsulmin, duke parë edhe sulmuesit e shumtë që futi në fushë Klopp. Dhe miqtë dyfishojnë rezultatin pikërisht pak një kundërsulmi të nisur nga Ranocchia për te Niasse i cili vetëm për vetëm me Mingolet godet bukur duke vulosur fitoren e miqve./ Telesport.al
