Emisioni i mbrëmjës së sotme në Opinion, ashtu sikundër ishte paralajmëruar, do të fokusohet te një ngjarje që ka dominuar javën e fundit, që është një aparaturë përgjimi e vendosur në Ministrinë e Brendshme, dhe që nga ngritur dyshime sidomos nga opozita, për qëllimin e vërtetë të instalimit të kësaj aparature, e cila sipas opozitës ka për qëllim përgjimin e saj. Kjo aparaturë ka krijuar edhe një farë tensioni jo vetëm midis palëve politike, por edhe vetë institucioneve.
Vetë ministri Tahiri ka dhënë një deklaratë që kjo aparaturë nuk ka aftësi përgjimi, ndërkohë që në këtë çështje është përfshirë edhe Presidenti, ndërkohë që pak minuta më parë në Prokurori është thirrur për të dhënë deklarimet e tij edhe drejtori i Përgjithshëm i Policisë. Në fakt kjo aparaturë e cila ka hyrë në Shqipëri nëpërmjet doganës së Durrës nuk ka një leje përdorimi nga Prokuroria e Përgjithshme. Është një aparaturë e cila kushton afërsisht 1 milion dollarë dhe ka hyrë nëpërmjet një BMË-je që është në pronësi të një bashkëshortit të një oficereje të lartë të policisë italiane.
Sipas Policisë, aparatura përdoret për identifikimin e numrave të telefonit çka përdoret për kapjen e telefonave të personave me precedentë penalë dhe nuk ka aftësi për zbardhjen e telefonatave.
Gazetari Artan Hoxha ka dhënë një informacion më të detajuar se çfarë është kjo aparaturë që ka futur në sherr politikën dhe pse po përdoret….
“Kjo pajisje në dijeninë time, është bërë e mundur referuar marrëveshjeve qe kemi pasur me policinë italiane, që janë marrëveshje teknike për policinë. Një pajisje e tillë është sjellë në Shqipëri sa herë policia jonë e ka pasur të domosdoshme për të luftuar grupe kriminale shumë të sofistifikuara. Është përdorur edhe ndaj një punonjësi të policisë sonë në Romë, më 25 gusht të 2008, i cili është kapur falë kësaj pajisje me një kile drogë.
Unë e di që pajisja kalon në doganë dhe procedura është e kontrolluar dhe kjo pajisje regjistrohet edhe kur del nga Shqipëria. Kjo pajisje shërben për të ndihmuae policinë kur ajo e ka të vështirë të identifikojë grupet kriminale. Interforca i ka hequr modulin për përgjim audio dhe dekriptim të bisedave. Aparatura gjen numrin e celularit, gjen IMEIN dhe numrin e serisë së kartës.
Para një muaji një person është marrë peng dhe u lirua falë kësaj pajisje. Kjo nuk është pronë e shtetit shqiptar.”
