Dilaver Bushi, vëllai i Besnik Bushit një prej dy të arrestuarve si të dyshuar nga prokuroria si autorë të bastisjes së prokurorisë së Durrësit, mëngjesin e 24 majit ka deklaruar se vëllai i tij është i pafajshëm. Ai ka treguar se: “Natën e bastisjes së prokurorisë, unë, im vëlla e dy persona të tjerë kemi qenë në bregdetin e Kavajës duke gjuajtur peshk. Merrni kamerat e sigurisë së hotel “Gjermanisë” verifikojeni e mos mbani njerëz të pafajshëm në burg”.
“Familjen e ka pa bukë dhe pa drita se nuk kanë lekë të paguajnë as dritat. Besniku nuk e di ç’janë kompjuterët e serverat fare. Një palë pinca për dritat ka mbajtur gjithë jetën në dorë. Në shtëpinë me qera është pa drita. Ka që nga janari që nuk paguante dot qiranë se nuk kishte gjetur punë. Dy vajzat në shkollë, nuk ka familja për të ngrënë”, nënvizoi i vëllai i autorit te dyshuar dhe te arrestuar per ngjarjen.
Familjarët kërkojnë drejtësi!
“Me drejtësi ai del vetë nga burgu. Të bëhet drejtësia mbi këtë çështje”- thotë i vëllai.
Siguria e prokurorisë dyshohet se u thye nga Besnik Bushi, 54 vjeç, Artur Isa 49 vjeç nga Sukthi dhe Nias Lena roja që kishte pesë ditë në punë. Dy të parët akuzohen për vjedhjen memories elektronike të Prokurorisë, dhe bastisjen e zyrës së prokurorit Afrim Shehu dhe të një oficeri të policisë gjyqësore.
Asnjë prej tre të arrestuarve nga policia nuk e ka pranuar pjesëmarrjen në bastisje, midis tyre edhe roja i institucionit. Në masën e sigurisë prokuroria si provë të vetme nxori 13 gjurmë gishtash të gjetura në sahatin e dritave dhe në derën e prokurorit Afrim Shehu. Motivi nuk është gjetur për asnjë prej të arrestuarve, po gjurme te një gishti unaze dhe një gishti te madh te secilit prej tyre janë gjetur.
