Ai u shndërrua në personazhin më të diskutuar të fundjavës në futbollin inferior shqiptar. Videoja ku portieri i Domosdovës Josel Shtrepi dhunohej nga lojtarët e Gramozit është një prej më të klikuara gjatë dy ditëve të fundit. Pa dyshim, është portieri më i diskutuar pas asaj që ndodhi në ndeshjen ndaj Gramozit në Ersekë.
Në rrëfimin e tij për gazetën “Panorama Sport”, portieri tregon gjithçka ndodhi në sfidën e së dielës. Rrëfimi “Çdo gjë po shkonte normalisht deri në minutën e 87- të kur ne shënuam golin e avantazhit.
Vendasit u acaruan nga ky fakt dhe nisën lojën e ashpër duke bërë ndërhyrje të rënda. Në një moment, i ndërhyhet shumë ashpër Karajt në mesfushë dhe të gjithë lojtarët vendas e rrethuan atë.
Unë vrapova për ta ndihmuar atë dhe përballem me lojtarët e Gramozit, të cilët më thonë: ‘po ti, çfarë do?’. Në atë moment më godasin me grushte e shkelma dhe të them të drejtën i godita edhe unë për t’u mbrojtur.
Aty ndërhynë menjëherë shokët e mi të skuadrës. Gjithashtu, dua të përgëzoj edhe forcat e rendit që reaguan në momentin e duhur, pasi mund të kishte shkuar edhe më keq duke qenë se gjithë lojtarët e Gramozit u vërsulën për të më goditur.
Madje, u çuan edhe ata nga stoli. Në atë moment më kanë goditur edhe me një gur në kokë tifozët, por që nuk ishte i rrezikshëm”, tregon fillimisht Shtrepi.
“Gardiani” i Domosdovës u ndëshkua me karton të kuq nga gjyqtari, në një kohë që është shoqëruar nga forcat e rendit gjatë të gjithë kohës derisa ka përfunduar ndeshja për të udhëtuar më pas drejt Prrenjasit së bashku me skuadrën.
“Arbitri më ndëshkoi me karton të kuq, pasi ashtu e vlerësoi ai. Iu duk sikur unë do të godisja ndonjë lojtar, në një kohë që thjesht vrapova drejt mesfushës për të ndihmuar shokun e skuadrës. Ne nuk na interesonte tensioni, pasi ishim duke fituar.
Kam hyrë në dhomat e zhveshjes i shoqëruar nga forcat e rendit dhe pasi jam bërë gati, kam pritur skuadrën derisa ka përfunduar ndeshja. Ishte një ngjarje që dua ta harroj sa më shpejt. Megjithatë, në një situatë të tillë, i rëndësishëm është fakti që përfundoi me kaq dhe nuk shkoi më keq. Aktualisht, jam mirë dhe nuk kam asnjë shenjë.
Dua të falënderoj forcat e rendit që më qëndruan pranë në çdo moment duke më mbrojtur. Nëse nuk do të reagonin ata në mënyrë të shpejtë dhe shokët e mi të skuadrës, atëherë mund të kishte përfunduar më keq, pasi m’u vërsulën 10 kundërshtarë për të më goditur”, përfundon rrëfimin e tij portieri i Domosdovës, Josel Shtrepi.
Ndërkaq, dhuna që ndodhi të dielën në Ersekë do të kalojë për shqyrtim në Komisionin e Disiplinës pranë FSHF-së.
