Artur Micko, nën/kryetar i FRESH (Forumit Rinor Eurosocialist) i ndaluar së bashku me 40 të rinj anëtarë të këtij forumi në pikën doganore të Ipsalas në Turqi, pasi autoritetet turke gjetën lëndër narkotike në autobusin ku udhëtonin drejt Stambollit, ka shpjeguar në lidhje telefonike me Neës 24 të gjithë dinamikën e ngjarjes. Sipas Mickos rrugëtimi i tyre ka filluar në Tiranë për të ndaluar një natë në Selanik dhe për të vazhduar më tej rrugën në Stamboll. Ata kanë kontaktuar me një agjenci turistike në Tiranë e cila u ka mundësuar edhe një autobus. Në Ispala, pikën doganore në kufirin greko-turk, policia turke ka kontrolluar autobusin pasi autoritetet kishin informacione se në autobus kishte drogë. Për më shumë ndiqni rrëfimin e vetë Mickos, mbi atë çfarë ka ndodhur.
Ky ështe edhe postimi i fundi në FB i Artur Mickos, që shpjegon ngjarjen
Një grup prej 35 aktivistësh të FRESSH janë nisur në datë 28 Janar për një udhëtim drejt Stambollit, udhëtim i kryer me një autobuz të
kompanisë Fenix travel & tours. Në autobuz, përveç 35 aktivistëve të FRESSH, ka patur edhe udhëtarë të tjerë me destinacion të njëjtë.
Pasi është kaluar kufiri mes Shqipërisë dhe Greqisë, ndalesa e parë ka qenë në qytetin e Selanikut, ku pasagjerët kanë kaluar natën në një hotel.
Ditën e dytë ka nisur udhëtimi nga Greqia në Turqi dhe në kufirin mes dy vendeve autobuzi është ndaluar për tu kontrolluar.
Gjatë kontrollit të mjetit, pasagjerët kanë qëndruar në pikën kufitare, jashtë mjetit. Informacioni i marrë nga autoritetet kufitare ishte se në autobuz dyshohet të jetë gjetur një sasi lënde narkotike e për pasojë shoferi i autobuzit, ndihmës shoferi, guida dhe një tjetër person janë ndaluar nga policia.
Pjesës tjetër të pasagjereve, pasi u janë dorëzuar bagazhet, u është vënë në dispozicion një tjetër mjet që i ka dërguar në destinacion Stamboll.
I gjithë grupi i 35 aktivistëve të FRESSH është në Stamboll ku po vazhdon programin e parashikuar. Asnjë prej të ndaluarve nga autoritetet turke nuk i përket grupit të aktivistëve të FRESSH.
