Situata nga zjarret ditët e fundit sa vjen edhe rëndohet, por në Ulëz gjendja paraqitet mjaft kritike, sidomos në fshatin Trodhen, ku familje pretendon se flakët iu kanë ardhur pranë shtëpisë, ndërsa mbrëmë një prej fëmijëve të tyre, një foshnjë një muajshe është asfiksuar nga tymi.
Në një komunikim telefonik me News 24, kryefamiljari Tanush Sefgjini ka apeluar për ndihmë, pasi zjarri ndodhet vetëm pak metra banesës së tyre. Ai sqaroi se fëmijët po mbahen brenda, pasi dje më i vogli ka shfaqur shumë probleme. “E kemi mbajtur me kompresa, ka qenë shumë keq. Ne jemi 10 familjarë me fëmijë e gra, po tentojmë ta fikim zjarrin por na ka rrethuar”,- sqaron ai, raporton BalkanWeb.
Më tej ai sqaroi se: “Duam ndihmë se rrezikojmë të digjemi, zjarri ka arritur vetëm pak metra larg banesës. Kemi që dje që po përpiqemi të shuajmë zjarrin, pork a dalë jashtë kontrollit, n aka rrethaur shtëpinë. Jemi të lodhur të rraskapituar. Fëmija mbrëmë e kemi pasur me kompresa të ftohta”,- thotë ai, raporton BalakanWeb.
Sipas kryefamiljarit, ai nuk mund të largohet nga shtëpia, pasi ka 150 krerë bagëti që s’mund t’i lërë të digjen. “I kërkojmë autoriteteve të sjellin një helikopter. Janë nisur 25 forca të ushtrisë nga Mati për të shuar zjarrin, por ato duan dy orë që të mbërrijnë në vendngjarje”.
