Shqipëria është debutuese në “Euro 2016” dhe nga kompanitë e basteve, apo nga të ashtuquajturit “bookmakers” kuotohet me koefiçentin 600, madje edhe më lart, për ta fituar këtë kompeticion.
Pra, në këtë drejtim, është e fundit, mbas gjithë finalistëve të tjerë. Një diçka e pritshme dhe e parashikueshme në letër, në fakt, megjithatë futbolli ka surpriza dhe vendos fusha e blertë.
Këtë ka dashur të thotë në një video, që po “shpërthen” rrjetet sociale, legjenda franceze, Eric Cantona. Përkundër rrjedhës, ai del kundër të gjithëve, teksa insiston se kombëtarja shqiptare ka shanse për të fituar “Euro 2016”, në Francë.
Në një spot televiziv, Cantona ka folur kryesisht për pjesëmarrjen e Shqipërisë në Europianin e Francës. Ndryshe nga ajo që thonë ekspertët e statistikave të “Goldman Sachs”, Cantona mendon se Shqipëria jo vetëm mund të paraqitet mirë, por edhe të fitojë turneun. Kujtojmë se ditë më parë, “Goldman Sachs” nuk i ka dhënë Shqipërisë asnjë shans që të fitojë Kampionatin Europian, në një studim që kanë bërë.
Ajo kishte parashikuar se Franca do ta fitojë këtë Europian. Ish-legjenda e Manchester United, Eric Cantona, i cili ka një emision, që quhet “Komisionari i futbollit”dhe transmetohet në “Euro Sport”mendon kështu:
“Goldman Sachs”? Sipas tyre Franca do ta fitojë Europianin. Shqipëria është e fundit, me 0% shanse për ta fituar. Kjo është çmenduri dhe po më bën nervoz. Po Greqia, në vitin 2004, çfarë bëri?
As ata nuk kishin asnjë shans për të fituar. Danimarka në vitin 1992. Po Leicesteri në Premier Ligë? Unë, si komisionar i futbollit, i jap një shans Shqipërisë që ta fitojë Europianin.
Po ashtu edhe Islandës. Futbolli nuk ka të bëjë me numra dhe statistika. Futbolli ka të bëjë me zemër, angazhim dhe ëndërr. Në futboll gjithçka është e mundur.”
