Festa më e madhe për fitoren e Majlinda Kelmendit në Rio 2016 ka qenë padyshim në Pejë, ku familjarë dhe miq të sportistes se talentuar dhe të trajnerit Drilon Kuka ishin mbledhur për të ndjekur garën.
Në një intervistë të dhënë për TV Dukagjini, babai i sportistes ka treguar emocionet e medaljes dhe faktin se më në fund, pas katër vitesh, kishte mundur të shihte i qetë një garë të vajzës së tij.
“Besoj se jo vetëm ne si familje, por i gjithë kombi shqiptar jemi kënaqur me ndeshjet e saj dhe mburremi me të se në historinë e Kosovës është shkruar një fitore e madhe dhe populli shqiptar nuk do ta harrojë”, tha Ismet Kelmendi.
“Që kur ka humbur në Londër para katër vitesh nuk kam parë asnjë ndeshje të saj. Sot kam qenë në lëvizje sa andejkëndej dhe nuk i pashë ndeshjet e tjera. E vetmja që ndoqa i qetë ishte finalja. Jemi të gjithë të kënaqur, jo vetëm populli shqiptar është gëzuar por edhe shokë boshnjakë, malazezë, maqedonas, jam i bindur se do të më urojnë. Sepse populli shqiptar nuk ka vetëm armiq”, theksoi ai.
https://youtu.be/UIRxbO04puY
