Autoritetet greke kanë bërë të ditur se do të përpiqen të mbyllin kampin në Indomeni, në kufirin mes Greqisë dhe Maqedonisë. Qindra mijëra emigrantë janë bllokuar pasi ata nuk mund të kalojnë më përmes Maqedonisë.
Tashmë që Maqedonia ka mbyllur kufirin, policia kufitare shqiptare ka rritur numrin e policëve, për të mbikëqyrur situatën. Shefi i policisë kufitare, Arben Jaçe është shprehur se ka patur disa incidente të vogla, por situata gjendet nën kontroll.
“Që kur Maqedonia mbylli kufirin, ne kemi patur disa incidente. Kemi shoqëruar një grup refugjatësh drejt Tiranës për tu marrë në pyetje. Situata është nën kontroll dhe kufiri do të jetë i survejuar 24 orë në ditë”, ka thënë Arben Jaçe.
Refugjatë të kampit në Indomeni janë shprehur se kanë frikë të kalojnë në Shqipëri, në vend të Maqedonisë. Ata e kanë përjashtuar Shqipërinë si mundësi kalimi. Refugjati palestinez, Hamza gjatë një interviste për Al Jazeera thotë: “ Kam dëgjuar shumë histori. Kam dëgjuar se Shqipëria është një vend me shumë mafia. Gjithashtu kam dëgjuar që shumë njerëz që kanë tentuar të kalojnë nga Shqipëria, ose janë vrarë ose janë zhdukur”./Klan
